محمد رمضان ينعى ضحية حفله في الساحل الشمالي ويواسي أسرته: هيقابل ربنا شهيد

حرص الفنان محمد رمضان، على تقديم التعازي لأسرة الشاب حسام، الذي توفي خلال حفلته بالأمس، نتيجة انفجار أنبوبة ضمن معدات “الفاير شو”، ما أسفر عن وفاة الشاب وإصابة 6 آخرين.

ونشر رمضان منذ قليل عبر صفحته الرسمية على فيسبوك، قائلا: “بقدم التعازي لأهل حسام، ربما يرحمه ويسكنه فسيح جناته، ويصبر أحبابه وأهله وأصحابه يارب، ويشفي المصابين”.

وأضاف رمضان، “لما شوفت الحدث وقفت الحفل علطول، واتعاملت زي أي إنسان يعني، وساعدت في نقل المصابين للإسعاف، ووقفت الحفل وهديت من ذعر الناس عشان أثناء خروجهم ميحصلش تكدس وحوادث تاني”.

وتابع: “بشكر الناس المتفهمة اللي دعت لحسام، وتفهمت الموقف، وتفهمت أن الحمدلله ربنا ألهمنا بالصح، وزعلان من الناس الوحشة اللي كلامها وحش وشمتانين في المتوفي وبيقولوا له هتقابل ربنا إزاي وأنت في حفلة”.

وأردف، “هيقابل ربنا شهيد راجل في أكل عيشه وبيشوف شغله مش فاشل زيك قاعد تكتب وتقول كلام وبتحدد هيروح فين وهيجي منين وعارف مين هيدخل الجنة ومين هيدخل النار”.

واستطرد، “لو أنت راجل فعلا بتحب دينك، فدينك قالك الكلمة الطيبة صدقة، يعني عندك كلمة طيبة قولها معندكش كلمة تخرس خالص.. ربنا يرحمه مرة تانية ويسكنه فسيح جناته، وقلبي مع والده ومع عائلته ربنا يرحمه”.